(Pagsusuri at pahayag ng COURAGE, Disyembre 19, 2011)

Paninindigan ng kawani at mamamayan ang pagkakamit ng katarungan.

Malaon nang ipinaglalaban ang pagpapanagot at pagpaparusa kay Gloria Macapagal-Arroyo sa matinding krimen niya sa taumbayan lalu na ang pandarambong at pamamaslang. Karugtong pa ito ng kilusang pagpapatalsik kay GMA na ginawang pangako at labis na pinakinabanagan ni Aquino upang makaupo sa Malakanyang.

Halos isa’t kalahating taon na ang administrasyong Aquino subalit nanatiling patumpik-tumpik ang aksyon sa pagpaparusa kay Arroyo at kanyang mga kasapakat. Ang totoo ay sinikap ni Aquino na sundin ang naging kasundan para sa akomodasyon ni Arroyo kapalit ng “maayos” na paglipat ng kapangyarihan noong eleksyong 2010. Ang pag-aatubili subalit pagpustura ni Aquino ay patunay sa matagal nang kompromiso at disumuladong special treatment sa mga Arroyo alinsunod sa dikta ng US. Kailangan ng US ang “mapayapang transisyon “ sa rigodon sa poder ng kanyang mga tuta.  Ito ay naaayon sa kanyang interes sa bansa. 

Subalit galit na ang mamamayan at ipinakita ito sa unti-unting pagbaba ng “popularity ratings” dahil inutil si Aquino para bigyan ng lunas ang papasahol na kalagayan ng bansa. Ang kahirapan, kawalan ng trabaho, di makabuhay na sahod, walang bahay at kulang na serbisyo.

 Ang pangambang sumambulat na ang galit na ito kung makakatakas pa si Arroyo palabas ng bansa kasama ang kanyang pamilya ang nagtulak kay Aquino na magkumahog na pumusturang seryoso sa paghahabol kay Arroyo.  Kaya nga bigla muling umangat siya sa mga “survey”.

Ang pagsambulat ng Balitaktakang Aquino-Corona sa Impeachment

Mula sa papalalang pambabatikos ay pinaigting ni Aquino ang pagkastigo kay Corona sa pamamagitan ng pag-impeach dito ng Mababang Kapulungan. Hindi na sumapat ang kawalang bahid ng pagiging “Statesman” at halos pagwawala sa pananalita ni Aquino laban kay Corona.

Nagamit ni Aquino ang rekord ng mga katungkulan ni Corona upang ipakita ang malapit na ugnayan ng Chief Justice sa dating Pangulong Arroyo. Gayun din ang ilang pasya ng Korte Suprema na pumapabor sa pamilyang Arroyo lalu na ang pinakahuling pasya sa pagbigay ng Temporary Restraining Order (TRO) kay Arroyo. Naging malaki ang pangamba ng mamamayan na ang TRO ay pagkakataon upang makatakas papuntang ibang bansa ang mga Arroyo. Kaya ano mang hakbang na makakapigil dito ay papanigan ng mayoryang namumuhi sa nakaraang pangkatin ni GMA.

KUNG KAYA MAY KAGYAT NA PANGANGAILANGAN ANG PAG-ALIS KAY CORONA KAUGNAY NG PAG-UUSIG KAY ARROYO, SUBALIT HINDI ITO MAPAGPASYA.  Kung seryoso si Aquino na usigin si Arroyo, matagal nang dapat kinasuhan si Arroyo sa mas mabibigat na krimen ng pandarambong sa kaban ng bayan, extra-judicial killings at malubhang paglabag sa karapatan, at pandaraya nuong 2004 Presidential Elections (Hello Garci). Hindi ang mas mahinang kasong 2007 electoral sabotage na tinatayang mapapawalang bisa.  Bukas pa ang pintuaan ng kompromiso ni Aquino para kay Gloria at tanging ang pananatiling mapagbantay ng mamamayan lamang ang mapagpasya upang makamit ang katarungan laban sa buong pangkat ni Arroyo!

Sinabi ni Corona na lalabanan nya ang impeachment upang pigilan si Aquino na makontrol ang Korte Suprema. Tutuo na parating sinisikap ng bawat Pangulo na ang Korte Suprema ay nagsisilbi sa Malakanyang sa pamamagitan ng kani-kanilang appointees. Ito ang layunin ni Arroyo nang ihabol niya ang pagtalaga kay Corona noong halos patapos na ang kanyang termino kaya tinawag na midnight appointee si Corona.

Itinatanghal ni Corona ang sarili bilang “tagapangalaga” ng demokrasya at tinawag na diktadura ang administrasyong Aquino na labis na ikinagalit ni Aquino. Nais ni Aquino na panatilihin na may moral claim siya ng paglaban sa diktadurya dahil sa kanyang mga magulang. Isa na namang nasindihang isyu sa labanan.

Ang impeachment kay Corona ay nagsilbing mitsa upang maglunsad din siya ng gera laban kay Aquino sa pag-asang matitipon niya bilang kakampi ang mga nasusuka na sa yabang at pagiging bully ni Aquino. Makakadagdag ito sa pwersa ng dati nang laban kay Aquino kaya talagang magpapaigting ito ng labanan ng mga dambuhalang may kanya-kanyang interes na pinangangalagaan.

Hubaran ng maskara ng panlilinlang si Aquino!

Bakit si Aquino ang dapat nating tanggalan ng maskara? Dahil sya ang kasalukuyang Pangulo ng bansa kaya sya ang pinakamakapangyarihan. Dahil sa araw-araw ay hinehele ang mamamayan ni Aquino sa retorika at pagsasalamangka ng statistika habang papalala ang ekonomya at kalagayan ng mamayan.  

Ito ang katotohanan:

Si Aquino ay punong kinatawan ng mga panginoong-may-lupa, kapitalista at iba pang nasa estado poder. Kailanman ay hindi ito gagawa ng aksyong tunay na para sa mamamayan. Mismong sa bibig ng mga tuta niya lumabas ang tutoo na galit na galit si Aquino kay Corona dahil sa mga desisyon ng SC na di naaayon sa gusto ng Palasyo. Pagsuheto kay Corona at babala sa iba pang Justices ang impeachment.

Bilang Pangulo, si Aquino na ang pinakamakapangyarihang myembro ng kanyang angkan - ang Conjuangco-Aquino at ng kauri nilang mga panginoong maylupa. Ginagamit nya ang kanyang poder sa pagpapatalsik kay Corona matapos na ilabas ng Korte Suprema ang pasya sa pamamahagi ng 6,800 ha.ng Hacienda Luisita Inc. sa mga magsasaka. Naghahabol ng panahon si Aquino dahil anim na buwan lamang ang palugit ng Korte upang ipatupad ang desisyon. At sa ngayon ay mainit na isyu pa ang “just compensation” na nasa Php6 na Bilyon.  Gayun din, marami pang hacienda sa buong bansa ang nakasalang sa SDO (Stock Distribution Option), ang iskema ng panlilinlang sa mga magsasaka na stock ang ibigay sa halip na lupa.

Ang paghahabol kay Arroyo kasama ng pag-alis kay Corona ay bahagi ng pakete ng mga buwitre sa Malakanyang upang panatilihin ang “survey ratings” ni Aquino. Ito ang nanatiling pang-kubli ng administrasyon sa sarili nitong mga pagkulang sa bayan at mamamayan. Ito din ang sinasakyan ng mga pulitikong sa ngayon ay nakakapit sa pundilyo ni Aquino.

Ang mabilis na pagsampa ng impeachment na nakakuha ng 188 boto at pag-amin ng liderato ng mababang kapulungan na minadali ito ayon sa utos ni Aquino ay pagpapakita ng kanyang kontrol sa Mababang Kapulungan. Siguradong umandar ang paggamit ng PDAF (pork barrel) at iba pang dagdag na pondo upang maisagawa ito. Mabilis din itong nalantad sa pagbitiw ng ilang Kongresista sa mayorya at Liberal Party.

Ang bilis ng aksyon sa impeachment ay siyang kawalang-aksyon naman nya sa usapin ng dagdag na sahod/sweldo, pagpapatigil ng demolisyon, pagbasura sa oil deregulation law at pagpaparusa sa mga oil companies dahil sa overpricing atbp. Ang kontrol ni Aquino sa Kongreso ay lantad rin na sa ipinasang kontra-mamamayang national budget na batbat ng pagbabawas sa serbisyong panlipunan.

Ipinakita ni Aquino na kaya nyang konsolidahin at kontrolin ang tatlong sangay ng pamahalaan – Executive, Legislative at Judiciary gaya ng ginawa noon ni Arroyo. Sa pagsisimula pa lang ng paglilitis kay Corona sa Senado, umugong naman ang galaw ni Aquino upang panghimasukan ito sa pamamagitan ng posibleng pagpapalit ng Senate President.

Sa gitna ng bangayan ng mga nasa poder, ang kawani at mamamayan ay di dapat manuod at magpatianod na lamang. Wala tayong mapapala sa tunggaliang ito kung hindi natin itutuloy ang paggigiit para sa ating mga batayang kahilingan para sa lupa, sahod/sweldo, trabaho at karapatan.  Dapat mangibabaw ang dagundong ng ating panawagan para sa makabuluhang pagbabago sa gitna ng alingasngas na nililikha ng away na ito.

Hindi tayo dapat malito.  Si Aquino at Arroyo ay walang pinag-iba.